قصة شعرية من تراث الشاعر المصري الراحل أحمد نجم فؤاد، تحمل عنوان “كلب الست”. وهي من أجمل ما غناه رفيق دربه المطرب الثائر الشيخ إمام.
ملخص الحكاية، أن مواطنا مصريا اسمه “اسماعيل” غلبان يمر بحي الزمالك الراقي، يعضه كلب مدلل اسمه “فوكس” تملكه كوكب الشرق المطربة الراحلة “ام كلثوم” يذهب لقسم الشرطة ليشتكي. وكان مما قاله له وكيل النيابة بعد أن علم أن الفاعل كلب “ام كلثوم” :
دا كلب الست يا ابني””” و انت تطلع ابن مين.
والبيت الشعري على لسان الشاعر الكبير احمد فؤاد نجم . الذي استفزه موقف وكيل النيابة الذي يتعين عليه طي الملف وتنفيذ التعليمات مثلما استفزه موقف الضحية اسماعيل الذي راح يفتخر امام الصحافة بان كلب الست ام كلثوم عضه.
ومما قاله احمد فؤاد نجم في هذا الموقف:
هيص يا كلب الست هيص لك مقامك في البوليس
بكرة تتألف وزاره للكلاب ياخدوك رئيس.
يحكى ان ام كلثوم اغضبتها القصيدة
وقالت :حبهدلو حشردو وتقصد الشاعراحمد فؤاد نجم فقيل لها انه مشرد اصلا.
وهذه القصيدة لحنها وغناها الشيخ امام صديق الشاعر وهي موجودة في موقع يوتيوب.
واليك القصيدة كاملة.
قراءة ممتعة
في الزمالك من سنين
و في حما النيل القديم
قصر من عصر اليمين
ملك واحده من الحريم
صيتها أكتر من الأدان يسمعوه المسلمين
و التتر و التركمان و الهنود و المنبوذين
ست فاقت ع الرجال
في المقام و الاحترام
صيت و شهره و تل مال
يعني في غاية التمام
قُصره يعني هي كلمه
ليها كلمه ف الحكومه
بس ربك لاجل حكمه
قام حرمها من الأمومه
و الأمومه طبع ثابت
جوه حوا من زمان
تعمل ايه الست ؟ جابت
فوكس رومي وله ودان
فوكس دا عقبال أملتك
عنده دستة خدامين
يعني مش موجود في عيلتك
شخص زيه يا اسماعين
و اسماعين دا يبقا واحد
من الجماعه التعبانين
اللي داخو في المعاهد
و المدارس من سنين
حب يعمل واد فكاكه
و يمشي حبه في الزمالك
و القيامه و الفتاكه
يرمو طبعن ع المهالك
عم سمعه من قيامته
حب يعمل فيها فله
بعد ما قلوظ بيجامته
اشترى حتة مجله
قول مشي بيقرا ف حكايه
من حكايات الغرام
و اندماجه في القرايه
خلا مشيه مش تمام
ع اليمين يحدف بعيد
خطوتين و يروح شمال
لمحه فوكس من الحديد
قال دا صيد سهل و حلال
هوب نط في كرشه دوغري
جاب بيجامته لحد ديلها
اسماعين بدال ما يجري
قال يا رجلي رجلي مالها
بص شاف الدم سايح
من عاليها و من واطيها
و ياللي جاي و ياللي رايح
المجله مش لاقيها
حبه و اتلمو الظنايا
اللي هما البوابين
و الحكايه و الروايه
قال لهم دا كلب مين ؟
كلب مين ما كلب مينشي
سمعه زود حبتين
قال له واحد فيهم امشي
اللي جابك عنده مين
قال دا شارع يا مواشي
والجميع بيمرو منه
اللى راكب واللي ماشي
مستحيل نستغنا عنه
كلمة من دا و كلمة من دا
ظاطو و اترسمت فضيحه
قول نهايته و القصد من دا
اسماعين أكل الطريحه
راحو قسم الشرطه طبعن
و النيابه كفيله بيهم
و اترمو ف الحجز جمعن
لما ييجي الدور عليهم
حبه والشاويش أمين
قال: “سعيد النقشبندي”
قام غريم عم إسماعين
قال له: “محسوبك يا افندي”
قام سي سمعه يروح معاه الشاويش قال غور بدمك
راح تعوصني و فوق قفاه كف طرقع داهيه في أمك
تفتكر يفضل سي سمعه
قد إيه في القسم نايم
استضافه الحجز جمعه
يا بلاش آدي العزايم
شاف بلاوي ما تتحكيش
من الجماعه المسجونين
قال يا عالم يا شاويش
يا نيابه يا مسئولين
خلصوه بعد المناهده
جثه من جحر الديابه
هي حسبه ساعه واحده
كان في مكتب النيابه
قال له ـ مالك يا اسماعين
قال له ـ زي البمب مالي
قال له ـ عضك فوكس فين
قال له ـ سيبني أروح لحالي
انت شوف سي فوكس يمكن
خد تسمم غصب عني
الوكيل قال برضه ممكن
و الشاويش قعد يغني
هيص يا كلب الست هيص لك مقامك في البوليس
بكرة تتألف وزاره للكلاب ياخدوك رئيس
انت تسوا ف النيابه
تسعميه م الغلابه
طب يا ريت يا فوكس كنا
و الا تربطنا القرابه
انت فين و الكلب فين
انت اده يا اسماعين
دا كلب الست يا ابني
و انت تطلع ابن مين
بشرا لاصحاب الديول
و اللي لهم أربع رجول
بشرا لاسيادنا البهايم
من جمايس أو عجول
اللي صاحبه يا جماعه
له أغاني ف الاذاعه
راح يدوس فوق الغلابه و النيابه
القصيدة مغناة بلسان الشيخ إمام :
